جني الهرري 

    - دخل الجلي عشان يهندس الدينمة، وزبط الكرتون طلع له جني، شبيك لبيك خادمك بين يديك، أطلب وتمنى.
   - لفت يمين، وشمال، وقال :  شوفني ضبحان من الكهرباء، والمي، وطفران، وعادني مادبرت حق التخزينة، مش فاضي لهرجلة أمك ، روح اللعب لك بعيد يا هبل، قالك شبيك لبيك. 
    - تلخبط الجني، واعتجم، وضاعت عليه الحسبة ، بعدما تمالك نفسه، شعر بالإهانة، قال بزجا : ما تصدقناش !. 
   - تتكلم عدني، وتشتني أصدق أنك بتعمل حاجة هذه الأيام، شوف نفسك يا أبو كرتونة ، إذا كان منك منفعة، ما خلوك تتخبي بكرتون. 
   - برطم الجني، وانتفخ سع سبع مرات، وزمجر، والعمارة قدها على حركرك ، قال : تتحداني، وتشكك بقدراتي يا بني آدم !. 
    - جني سني شيعي، كلامك ما دخل رأسي، أقول لك طير من قدامي دي الساعة، قبل ماربخ يدي واطنك أبوك كف، وخليك تتفحرر، وتدور ترجع الكرتون من حيث ما خرجت. 
   - قال الجني : يا أخي أنت من فين جابوك ، أول مرة في حياتي أشوف إنسان زيك مكارح، اشتي أخدمك، وأعمل معك خير، وأنت تتقفز فوقي. 
   - وأنا عمري ما شفت جني عبيط وزناط زيك، شكلك جني عاده في الهندول أو مكرع وشارب هرور !. 
   - ربنا يسامحك، الشتيمة تلف تلف وترجع لصاحبها، أشوفك مكهرب، وحياتك كلها مشاكل !. 
    - قدنا أقول لك أنك جني عبيط، نحن أصلا في عدن نعيش أموات، يعاقبونا، ونقول زيدوا ، يقتلونا، ونعيش عناد، وأنت تجي تتفشفشلي، وتقوللي أماني، وتباتيك.
   -  تعبتني معك ، ايش صنف لي أطلع لك، أيش رأيك تجربني، وتشوف !. 
    - أنت بعقلك مصدق نفسك أنك جني، أفلام الهاو جاو، وشاولي باولي كانت زمان، لما كانت عدن سلى، أما دحين كل واحد يدور له بقرة تلحسه. 
    - عند الله وعندك اختبرني، ما بتخسرش حاجة، قدك بلا راتب، ولا كرامة، وساطح باطح، وسارح مروح تتلطم من الانتقالي، والعليمي، والحكومة، جات عليه أنا، طيب أجيب لك دينمة جديدة؟. 
   - تحسب دمك خفيف صح ، بطل الهبالة، وانقلع من وجهي. 
     - خليك الزرزة، ولا تعتبرني جني، واعتبرني الدكتور الوالي أو بن مبارك ، وأنت المعلم الذي شرشحوه، وبعدين باسوا رأسه ، ولا حاسبوا حد ، ولا نظروا في قواعد التربية أو راجعوا مناهج التعليم، وطربلوها، والناس تتفرج، ومعجبة بالصور ، بس شطارتكم علينا !. 
     - شوفك رجعت طبازة يا جن الجن، ولكن بمشي بعدك، وورينا شطارتك، وإذا نجحت، بقول عليك أنك جني مربت ، وبن أبوك. 
    -  شعر الجني بالنشوة، وقال : اوعدك أنك ستفخر بي. 
     - خلينا أفكر ايش أطلبك.. ايش.. ايش.. ايش.. ايوه ايوه، اشتيك تجاوب لي على سؤال واحد، ليش منعوا القات الهرري؟.
   - قلب الجني يداته، ومط شفائفه، واشتمق ، وخرج زبد سعابيبه من لقفه ، وبعد دكمة على ظهره، نطق، وقال :  مدري !.
    - حتى أنت طلعت عزروط زيهم، شبيك لبيك، وتنفخ صدرك، وتشطح زي القيادة حقنا، وبعدين تنزل على فاشوش.
    - قد قلنا لك، وحاولنا نعلمك، ونفهمك، ولكنك قشقشة، هذولا حتى المعجزات ما تنفع معاهم. 
     - روح بيع لك دوم، ولا قول لك كسر عجر الدوم، وتأجر بالفراصيص بتنفع نفسك. 
    - شل شماطيرك، ووريينا جمال خطوتك يا بعطوط واحد، وحسك أشوفك في عدن مرة ثانية، يكفي قد معانا بعاطيط كثير من زيك، وبنطرش منهم. 
    - بس تقولوا ليش يكافحوا القات الحبشي، مش كله قات، ولا عشان يغلوا كل شيء، ويستفيدوا من كل شيء ، ويمصوا الناس، واكرام الشعب دفنه.  
    - نعتقد أن الحملة فيها إنة، يعني البلاد جنة، والهرري بيفسدها أو كيف ؟!. 
   - احترموا عقولنا، وتوقفوا عن شطحاتكم، وأتركوا المواطن يتنفس، فمازلنا أحرارا كما ولدتنا أمهاتنا.
      ... رخيص ... 
- ياسر محمد الأعسم/ عدن 2024/4/14