انين وطن.. وصمت شعب
المنبر الثقافية - قصيدة : شاعرة سبأ
قصيدة: شاعرة سبأ
دولة رشادٍ جتنا المعتديــن..
وفي عهد حكمه سقط سعر الريـال!!
وصارت العملة الأجنبية أرخص بثمين..
من ناس للوطن كانوا مقامه والمقال!!
مسكين ذا مسكين ما له مـعين..
وما عنده القدرة ولا مصدر لمال!!
ومن راتبه ما يجيب له ملح وطحين..
ومن فقره أصبح في معاناة الهزال!!
واللي حياته كلها مرت بـديْن..
ويموت ودينه وَرث باقي للعيال!!
الحال مأساوي وبلاءه محزين..
الحرب جانب والغلا جانب وطال!!
واتحالفوا الكفار وبعض المسلمين..
ليفصلوا ركن الجنوب عن الشمال!!
كي يستفيدوا من ثرا اليمن الثمين..
وساعدوا الجنوبي على الانفصال!!
ودربوا الحوثي على مذهب ودين..
كي يشعلوا نار الحرايب والقتال!!
ولهم هدف ينهوا العباد الصالحين..
وينشروا البدعة وأفكار الضلال!!
فاللي يصير اليوم خُطط له من سنين..
وخلّوا اليمن ميدان تحقيق المنال!!
لعبة لعينة قد لعبها الطامعين..
واستخدموا فيها من أشباه الرجال!!
لكن بالنهاية قوى إبليس اللعين..
تفشل وتتقهقر وتدفن في الرمال!!
والله مع اللي يخافه كل حين..
واللي يعيش عيشة بلقمةٍ حلال!!
واتذكروا أن الله يحب الصابرين..
والفرج منه تعالى ذو الجلال!!
